Hvað er Netvís?

Netvís er miðstöð um félagslegt netöryggi og miðlalæsi

Hlutverk okkar er að hvetja með markvissri fræðslu, vitundarátökum og ýmiskonar þjónustu til betri umgengni við tækni og miðla. Markmið okkar er að efla hugtakaskilning, vitund og valdeflingu almennings.

Við viljum stuðla að félagslegri sjálfbærni í stafrænum heimi og virða mannréttindi barna í stafrænu umhverfi, eins og þeim er lýst í almennum athugasemdum Barnaréttarnefndar Sameinuðu þjóðanna, nr. 25. Enn fremur að styðja við stefnu Evrópusambandsins BIK+ og styðja við innleiðingu á Digital Services Act, þegar sú löggjöf tekur gildi á Íslandi.

Mikilvægur liður í að uppfylla skyldur ríkisins samkvæmt Barnasáttmálanum, sbr. lög nr. 19/2013 er að tryggja jafnt aðgengi barna að fræðslu og gera viðeigandi ráðstafanir til að vernda börn gegn ofbeldi og misbeitingu á neti.

Samstarfsaðilar verkefnisins mynda stýrihóp ásamt fulltrúum ráðuneyta. Jafnframt er starfandi ráðgjafaráð Netvís sem samanstendur af breiðum hópi hagsmunaaðila.

Netvís heyrir undir Fjölmiðlanefnd

Samkvæmt lögum um fjölmiðla hefur Fjölmiðlanefnd meðal annars það hlutverk að efla upplýsinga– og miðlalæsi almennings.

Frá janúar 2024 hefur Fjölmiðlanefnd borið ábyrgð á SAFT verkefninu, vitundarvakningu um netöryggi barna sem unnið er í samstarfi við Hjálparsíma Rauða krossins 1717, Ábendingalínu Neyðarlínunnar og Ríkislögreglustjóra og Samfés.

Skráning í Tengslanet um
upplýsinga- og miðlalæsi

Netvís leiðir Tengslanet um upplýsinga- og miðlalæsi (TUMI)

Hlutverk tengslanetsins er að auðvelda upplýsingaskipti milli þeirra aðila sem vinna að upplýsinga- og miðlalæsi á Íslandi og greiða fyrir samstarfi meðlima. Aðilar tengslanetsins miðla þar þekkingu, rannsóknum, verkefnum og öðrum úrræðum sem tengjast tengslanetinu.

Stjörnumerktar* línur er nauðsynlegt að fylla út

Alþjóðasamstarf

Netvís tekur virkan þátt í evrópsku samstarfi um netöryggi og miðlalæsi, meðal annars í gegnum Insafe og INHOPE, tengslanet netöryggismiðstöðva og ábendingalína í Evrópu, og alþjóðlega samstarfsvettvanga á borð við EBMS og EPRA.

Starfsmenn Netvís hafa tekið þátt í vinnuhópum innan EBMS og í miðlalæsistengslaneti EPRA (EMIL) sem vinnur að því að efla miðlalæsi og viðnámsþol þjóða gegn upplýsingaóreiðu, í þágu lýðræðis.